BR LA UNION – Sagsaganaan ti Local Government Unit (LGU) ti San Juan, La Union ti pannakaipatungpal ti ₱2-milion a Solar-Powered Irrigation System (SPIS) a nairanta para iti Pacpacac-Pagdildilan Farmers Association, Inc.
Karaman daytoy kadagiti kangrunaan a napagsasaritaan bayat ti courtesy call dagiti pannakabagi ti Office of the Provincial Agriculturist (OPAg) kenni San Juan Mayor Mariquita P. Ortega idi Setyembre 30, 2026.
Target ti proyekto a tulongan dagiti mannalon babaen ti panangipaay iti ad-adda a mapagtalkan ken alternatibo a sistema ti irigasyon babaen iti enerhiya nga agtaud iti init.
Babaen ti Solar-Powered Irrigation System, manamnama a maipaayan ti naan-anay a supply ti danum dagiti mannalon, nangruna iti panawen a limitado wenno kurang ti supply iti irigasyon.
Paset ti Solar-Powered Irrigation System dagiti addang ti gobierno a mangpapigsa iti imprastruktura ti irigasion ken mangtaming kadagiti karit a sangsanguen dagiti mannalon iti pannakamantener ti produksiyon dagiti apitda.
