LA UNION – Nasurok kumurang a 1.5 million doses ti COVID-19 vaccines iti nailista ken agdama a supply para iti intero a Rehiyon Uno kabayatan ti naiyuswat a Wall-to-Wall COVID-19 vaccines inventory iti DOH Center for Health Development One.
Naamwan a ti nasao nga inventory ket kaunaan a naiyuswat ditoy Region One ken manamnama a maipatungpal daytoy iti dadduma pay a rehiyon iti intero a pagilian.
Iti pannakiuman ti Bombo Radyo La Union kenni DOH-CHD 1 Regional Director Paula Paz Sydiongco, kinunana a babaen iti nasao nga aktibidad idi Pebrero 18 agdama a tawen, naamwan iti pakabuklan a bilang dagiti bakuna kontra COVID-19 ken nakadulin iti naduma-duma nga storage facility ditoy rehiyon a pakaibilangan iti department of health.
Innayon pay ni Sydiongco a nairanta ti naisayangkat nga inventory tapno masiguro nga adda iti natalged a pasilidad wenno umno iti pannakaidulin dagiti bakuna, a mausar iti agtultuloy a vaccination program ti gobyerno.
