LA UNION – Bin-ig pay laeng nga ispekulasyon iti agwar-waras ita a damag nga addan iti desisyon nga impaulog ti Court of Appeals (CA) maipapan iti apela nga indatag ni sigud a San Fernando City Mayor Herminigildo “Dong” Gualberto kalpasan a napatakyas iti puwesto idi May 2019 gaputi maipagarop a saan nga umiso a panangbusbos iti pondo ti lokal a gobyerno.
Iti eksklusibo a pannakiuman ti Bombo Radyo La Union kenni Barangay Kapitan Godofredo Flores ti Barangay Tanqui, San Fernando City, La Union kinunana nga awan pay met iti naawat da a dokumento a naggapo iti korte, a mangipaneknek koma nga addan iti desisyon ti CA a pumabpabor iti sigud a mayor.
Impaganetget na a saan a balido nu iti laeng social media, partikular iti facebook page ni ‘Manong Dong’ a rumrumwar iti nasao nga impormasyon.
Ngem ingkaso man kunana, respetaren da iti anyaman a pangngeddeng ti pagukuman.
Nupay kasta, adda pay met kunana iti gundaway da a mangidatag ti motion for reconsideration idiay Korte Suprema, nga isuti pagtaudan ti pinal a desisyon.,
Ni Flores ket maysa kadagiti 47 a petisyuner ken barangay kapitan ditoy syudad, a nabirngasan a KAP 47, a nangidatag ti reklamo idiay Ombudsman kontra kenni sigud a Mayor Gualberto.
Idi May 2019, impaulog ti Office of the Ombudsman iti dismissal order kontra kenni Gualberto gaputi maipagarop a saan nga umno a pannaka-usar iti pondo ti lokal a gobyerno, a nagramot iti rehabilitasyon iti city plaza a dimmanon iti aganay P66-M.
