LA UNION – Natay ti maysa nga indibidual bayat a maysa pay ti agtultuloy a maag-agasan iti ospital kalpasan a naidungpar ti naglugananda a tricycle iti maysa a van iti national highway iti deppaar ti Brgy. Pagdaraoan, siudad ti San Fernando.
Binigbig ti San Fernando PNP ti biktima a ni Norvy Ganaden, 22, bayat a ti nadundunor ket ni Joel Ganaden, 32 nga agpada a residente iti Brgy. Saoay ditoy siudad.
Iti imbestigasion ti pulisia, daldalyasaten da ganaden ti kalsada pasado alas-11:00 idi rabii idi sumungsungad ti napartak ti tarayna a van a minaneho ni Joel Esperanza, 32 a residente iti Brgy. Dalumpinas Oeste, San Fernando City.
Ginandat pay da Ganaden a pagsilawen ti headlight ken nagsardeng iti kalsada ngem immagaw iti linya ni Esperanza agingga a dimmeretso iti tricycle.
Nagsagrap iti nakaro a head injury ni Norvy bayat a naderder met ti saka daytoy.
Naitaray pay iti Ilocos Training and Regional Medical Center dagiti agkasinsin a da Ganaden ngem naideklara a dead on arrival ti maysa.
Iti agdama ket nakabaluden ni Esperanza kalpasan a napaneknekan a nakainom daytoy idi napasamak ti insidente.
