L AUNION-Natay ti maysa a bicycle rider kalpasan a madungpar daytoy iti sports utility vehicle (SUV) ti kawatiwatan iti Aspiras Highway idiay Barangay Macalva Sur, ili ti Agoo, La Union.
Nabigbig ti biktima a ni Leonardo Padilla, residente ti Barangay Caoige, ili ti Tubao, La Union.
Base iti imbestigasyon ti Agoo Police Station, killaat a nadungpar ti biktima a nakasakay iti bisekletana babaen ti SUV a manmanehuen ni Joselito Bator, 42-anyos, residente iti Barangay Gonzales, Tubao.
Maipagarup a nadungpar ti biktima kalpasan a ginandat ti driver iti SUV a liklikan koma a madungpar ti sabali pay a lugan.
Dagus a naiturong iti kaaseggan nga ospital ti biktima ngem natay met laeng daytoy kabayatan a maag-agasan.
Maipagarup a saan metten nga interesado ti pamily ni Padilla a mangidatag iti reklamo kontra iti nasao a driver ti SUV.
Kabayatanna, madama met a maag-agasan idiay ospital ti maysa a 73-anyos a lola kalapasan a madungpar daytoy iti traysikel idiay MacArthur Highway idiay Barangay San Pedro iti nasao met laeng nga ili.
Nabigbig ti biktima a ni Martina Melanes, residente ti Barangay Nazareno, Agoo.
Naammuan manipud iti pulisya, kabayatan a bumalballasiw iti kalsada ti biktima ket killaat a dinalapus met daytoy ti traysikel a manmanehuen ni Arsenio Augustin, 29, residente iti Barangay San Agustin, Norte.
Ur-urayen met ti pulisya iti pangeddeng iti pamilya no sampaanda iti darun ti nasao a tricycle driver.
