ROSARIO, LA UNION – Dead on arrival idiay ospital ti 50-anyos a misis bayat a nadundunor ti live-in partner daytoy kalpasan ti panagdinnungpar ti maysa a kotse ken ti nagluganan dagitoy a tricycle iti Rosario-Pugo Road idiay Barangay Alipang, Rosario, La Union alas-8:40 iti rabii, Mayo 9.
Nabigbig ti pimmusay a ni Belyn Leteral, residente iti ili ti Sison, Pangasinan.
Base iti impormasyon a nakalap ti Bombo Radyo manipud Rosario Police Station, agpada a dumaldalyasat iti agsabali a direksyon ti kotse a minaneho ni Marcelino Lacay, 44-anyos, ken residente iti Camp Dagwa, La Trinidad, Benguet; ken ti tricycle a minaneho met ni Carlito Boado, 43-anyos ti Barangay Casilagan, Rosario, idi maipagarup nga immagaw iti linya ti kotse kasaruno iti panagdinungpar dagiti nadakamat a lugan.
Agpada a nagsagaba ti pannakadundunor da Boado ken Leteral kasaruno ti pannakaiturong dagitoy iti pagagasan.
Naideklara a dead on arrival ni Leteral gapu ti nakaro a sugat iti napasaran ti bagi kalpasan ti napasamak nga aksidente.
Naamwan a nagpositibo iti AB Test ti respondent driver.
Paawiden koma ni Lacay idiay Benguet bayat nga agturong met idiay Sison, Pangasinan iti aglive-in idi napasamak ti ti aksidente.
Iti agdama, agtaltalinaed iti kustodiya ti Rosario Police Station ti suspek a sumangsango ti kaso a Reckless imprudence resulting to homicide and damage to property.
