BAUANG La Union – Agtaltalinaed pay laeng iti ospital dagiti 16 a naglugan iti elf truck a nagsikig idiay kawatiwatan ti national highway idiay Barangay Santiago, ili ti Bauang, La Union.
Naammuan ti Bombo Radyo manipud iti Bauang Police, maipagarup a naggapu ti nasao a nagluganan dagiti biktima a minaneho ni Rufo Perez a nagburas kadagiti bunga ti mais idiay Barangay Bucayab, Bauang ken agawid koman dagitoy idiay ili ti Aringay, La Union idi a napasamak ti aksidente agarup alas-6:45 itattay bigat.
Base iti istoria ti driver, maipagarup a ginandatna a liklikan iti kasinnabat a lugan nga immagaw iti linyana kasaruno iti panagsikig ti truck kalpasan a napukawan daytoy iti kontrol ti panagmaneho.
Naipullasit dagiti pasahero ken nakaiwara dagiti sinako a kaap-apit a mais a karga ti nasao a lugan iti kalsada.
Dagus nga immarayat ti pulisya ken dagiti kameng ti Bauang Municipal Disaster Risk Reduction and Management Office tapno iturong idiay Ilocos Training and Regional Training Center idiay syudad ti San Fernando dagiti amin a nasugatan a biktima, ngem naideklara a dead on arrival ni Norma Fang ti Tubao, La Union kalpasan a maipakpak iti ulo daytoy.
Kabayatanna, agtultuloy a dukduktalen iti pulisya ti pakabigbigan iti nagmaneho ti saan pay a naammuan a kita ti lugan a simmabat iti nadakamat a truck ken no adda iti sungsungbatan daytoy iti napasamak nga aksidente.
