LA UNION – Natay ti maysa a biker, kabayatan a dua pay iti nadundunor kalpasan a nadungpar dagitoy iti maysa a kotse iti national highway a masakupan ti Barangay Santiago, ili ti Bauang, La Union itattay alas-12:40 ti parbangon.
Nabigbig ti pimmusay a ni Kenjie Maturan, 15-anyos; kabayatan a dagiti nasugatan ket isuda Jerson Julaton, 14-anyos, ken Mc Airon Aquino, 14-anyoS, agpapada a residente iti Pozorrubio, Pangasinan.
Naammuan ti Bombo Radyo manipud iti Bauang Police Station, daldalyasaten dagiti nadagiti nasao a biktima a nakalugan ti bukodda a bisekleta ti outerlane iti nadakamat a kalsada idi a nadalapus dagitoy iti kotse a manmanihuen ni Abner Baldeo, 38-anyos, negosyante ken residente ti Barangay Poblacion, Urdaneta City, Pangasinan.
Maipagarup a nag-overtake ti nasao a kotse manipud iti kasungani a direksyon ken napukawan daytoy iti kontrol ti manibela kasaruno iti pannakadungpar dagiti biktima.
Agpapada a naiturong idiay Ilocos Training and Regional Medical Center (ITRMC) dagiti biktima ngem natay ni Maturan kabayatan a maag-agasan.
Kabayatanna, maipagarup a baklayen iti respondent driver para iti nagastos amin a biktima para iti ospital ken iti punpon ti maysa kadagitoy.
