LA UNION – Dead on arrival idiay ospital ti tricycle driver kalpasan a nakidinnungpar ti luganna iti kasinnabatna a closed van idiay national highway a sakupen ti Barangay San Jose Sur, ili ti Agoo, La Union.
Nabigbig ti pimmusay a ni Albert Huera, 35, residente ti Barangay Sta. Ana iti nasao nga ili.
Naammuan ti Bombo Radyo manipud iti Agoo Police Station, kabayatan a daldalyasaten ti biktima ti nadakamat a kalsada a nakalugan iti traysikelna ket nakidinnungpar daytoy iti kasinnabat a closed van a manmanehuen ni Cesar Reforma Jr., 31, residente ti Barangay Alua, San Isidro, Nueva Ecija.
Naiturong idiay La Union Medical Center dagiti dua ken ti pasahero ti closed van ngem nauyos iti biag ni Huera gapu ti nakaro a sugat iti nilak-am daytoy.
Adda metten iti nasayaat a kasasaad dagiti nakalugan ti closed van.
Agtultuloy ti imbestigasyon iti pulisya tapno ammuen no adda ti sungsungbatan ni Reforma iti napasamak nga aksidente.
