Maysa ti natay idinto a 3 ti mapukpukaw kalpasan a nalmes iti kabaybayan iti nagsina a lugar idiay San Juan, La Union.
Ti pimmusay a biktima ket maya a 12 anyos a lalaki residente ti Barangay Palina, Kibungan, Benguet.
Maibasar ti nakalap nga impormasyon ti Bombo Radyo La Union manipud iti Philippine Coast Guard sub-station San Juan, dagiti biktima kadwa ti pamilyada ket simmangpet idiay Villa Violeta Beach Resort agarop alas 9 ti bigat tapno rambakan ti Paskua idiay Barangay Taboc, San Juan, La Union idi kalman Disiembre 26, 2023.
Naamuan a napan nagdigos iti baybay dagiti biktima idi kelaat nga inguyod isuda ti dakkel a dalluyon.
Kalpasan ti 10 minutos immuna a nasarakan ti bagi na ti 12 anyos a biktima a lalaki kagiddan ti pannakaiturong na ti Bacnotan District Hospital ngem naideklara a dead on arrival babaen iti attending physician.
Iti sabali a bangir, sabali manen a kaso ti pannakalmes ti napasamak met idiay Barangay Urbiztondo ita nga aldaw Disiembre 27, 2023.
Maibasar iti nakalap nga impormasyon ti Bombo Radyo La Union manipud iti 12 nga agtutubo a taga Barangay Balacbac, Baguio City, simmalogda ditoy La Union tapno mapag agdidigos iti kabaybayan idiay ili ti San Juan.
Kabayatan ti panagdigdigos ti 6 kadakuada idi kellaat nga naiguyod dagitoy iti napigsa a dalluyon.
Naisalakan ti surfer dagiti uppat nga agtutubo ngem ti dua a kakaduada nga isuda John Ricks Bello, 20 anyos, ken Jedie Bangsail iti saan pay a nasarakan dagiti rescuers.
Mainaeg iti daytoy, nangipaulog ni San Juan Mayor Arturo Valdriz Executive Order No. 23-2023 epektibo ita nga aldaw Disyembre 27, 2023.
Mainaeg daytoy iti pannakaipawil dagiti aktibidad ken panagdidigos gapu iti dadakkel a dalluyon iti baybay iti nasao nga ili.
Kabayatan na, madama pay laeng ti panagsapsapol dagiti rescuers iti bagi ti dua a lallaki ken maysa nga ubing a nalmes iti baybay a sakopen ti Barangay Urbiztondo ita nga aldaw ken idi kalman idiay Barangay Taboc, San Juan, La Union.
