LA UNION – Dead on-the-spot iti maysa a 16-anyos nga barito bayat a nadun-dunor iti dua a nataengan a kakadwa na, kalpasan a nadungpar dagitoy ti freezer van iti kawatiwatan ti Pugo-Rosario highway, sakop ti Barangay San Luis, Pugo, La Union.
Pimmusay ni Jericho Baylosis idinto a nadun-dunor da Bayani dela Cruz, 60, addaan asawa ken Diosdado Dulay, 50, addaan asawa, agpada a mannalon, ken residente da iti nadakamat a lugar.
Nabigbig met iti respondent driver a ni Diosdado Urbano, 35, addaan asawa, taga Laoac, Pangasinan.
Maibasar iti imbestigasyon ti Pugo Police Station, bumallasiw koma dagiti tallo a pedestrian iti kalsada, manipud laud agturong iti daya a direksiyon, idi nadungpar dagitoy iti freezer van.
Agpar-parang iti imbestigasyon dagiti otoridad a ginandat ti respondent driver nga ag-overtake iti nagmenor a pampasahero a bus tapno ilugan iti bus inspector, ngem maipagarop a na-lost control iti manibela a puon ti nakadungparan na kadagiti biktima.
Naamwan a nakabaklay pay ti maysa a sako ti irik iti mannalon agsipudta kagap-gapo dagitoy a nag-tresher iti palay, idi mapasamak ti insidente.
Iti agdama, nakarwaren iti ospital ni Dulay bayat ani Dela Cruz ket naiyakar iti Ilocos Training and Regional Medical Center (ITRMC) ditoy syudad ti San Fernando para iti naan-anay a pannakataming na.
Iti met respondent driver ket nagsagaba iti minor injury ngem addan iti natalged a kondisyon bayat a ti van ket nagpasar iti pannakadadael kalpasan a nabaliktad.
Adda ita iti custodiya ti Pugo Police Station ti suspek ket manamnama maidatagan ti kaso ita nga aldaw ti Lunes.
