LA UNION – Maysa iti natay bayat a tallo dagiti nasugatan iti napasamak a karambola iti tallo a behikulo iti kawatiwatan ti national highway, sakop ti Barangay San Benito Sur, Aringay, La Union.
Nakairamanan daytoy iti maysa a kotse, minaneho ti managan Rodolfo Rullan, 76, addaan asawa, residente ti Dulao, Aringay, La Union.
Maysa a motorsiklo a minaneho iti managan Eric Dulatre, 38, addaan asawa, residente ti Barangay Sta Rita East, Aringay, La Union.
Ken maysa a traysikel, minaneho ti managan Ramon Franco Dingle, 51, residente ti Barangay Sta Lucia, Aringay, La Union.
Iti inisyal nga imbestigsyon iti Aringay Police Station, iti kotse ket agtur-turong iti amianan a direksiyon idi kellaat a nagsikko daytoy, nga isu metten iti naki-dinnungparan na iti agpa-abagatan a motorsiklo.
Iti kapigsa ti impact ti aksidente, urayla nagposipos iti motorsiklo ket naidungpar iti traysikel, nga agtur-turong iti amianan a direksiyon.
Kas resulta, iti motorcycle rider ken backride daytoy a nabigbig iti nagan a Rony Ventura, 26, baro, residente ti Poblacion, Caba, La Union ket agpada a nagsagaba iti pannakadun-dunor iti bagi ken naiturong dagitoy idiay La Union Medical Center idiay Agoo, La Union tapno maagasan.
Kabayatanna, iti met driver ti traysikel ken iti pasaheros daytoy a mismo a misis na, managan Frecila Dingle, 39-anyos, ket nagsagaba met laeng iti pannakadun-dunor iti naduma-duma a paset ti bagi ken naiturong da idiay Caba District Hospital idiay Caba, La Union ngem naideklara a dead-on-arrival ni Mr. Dingle.
