LA UNION – Maisag-saganan iti kaso kontra iti misis a nagmaneho ti sports utility vehicle (SUV) a nakadungpar iti traysikel ken nakatayan ti maysa kadagiti uppat a pasahero iti kawatiwatan ti national highway idiay Barangay Sta. Ana ili ti Agoo, La Union.
Nabigbig iti 42-anyos a respondent driver a ni Zenaida Raquino, residente ti Gov. Luna St. Barangay IV ditoy syudad ti San Fernando, La Union.
Naamwan ti Bombo Radyo manipud Agoo Municipal Police Station, a ginandat nga ag-overtake iti SUV ngem nadungpar na metten iti traysikel a minaneho ti 21-anyos a baro a ni Bon Cris Juloya, residente ti Barangay Alaska idiay ili ti Aringay ditoy probinsiya, a nakaigapwan ti aksidente.
Natay bayat a maag-agasan iti La Union Medical Center idiay ili ti Agoo, La Union iti maysa a pasahero ti traysikel a ni Gloria Yaris, 54-anyos.
Agtultuloy met a maag-agasan iti nasao nga ospital iti tricycle driver kadwa na iti dadduma pay a pasaheros nga isuda Ignacio Padilla, 40-anyos; Gladys Padilla, 16-anyos; Jofelyn Mangaoang, 38-anyos, agpapada a residente idiay Barangay Dulao, Aringay.
Manamnama nga ipaima ita nga aldaw ti pulisya iti piskalya ti kaso maikontra iti respondent driver tapno adalen daytoy.
