Nangidatag dagiti sangapulo a miyembro ti House of Representatives iti resolusyon kenni Presidente Ferdinand Marcos Jr., nga ideklara ni Chinese Ambassador Jing Quan a persona non grata.
Gapu daytoy iti nagbalin a waragawag ni Jing Quan, a nalaka laeng a maparmek ti China iti Pilipinas nu agusar daytoy ti pwersa.
Nagramutan daytoy iti nagduduma a reaksyon kadagiti mammanday linteg, iti agpada a Kamara ken Senado ditoy pagilian.
Kabilang dagiti nangidatag ti House Resolution No. 1562 ket isuda Representative Ziaur-Rahman Alonto Adiong, Adrian Michael Amatong, Kaka Bag-ao, Percival Cendaña, Leila de Lima, Chel Diokno, Dadah Kiram Ismula, Cielo Krisel Lagman, Karl Fernandez Legazpi, ken Mark Anthony Santos.
Kidkiddawen pay dagiti mammanday linteg kenni Presidente Marcos nga ipaayan ti seryoso a konsiderasyon iti apela da seknan iti insawang a sarita ti Chinese ambassador.
Iti joint statement dagiti mammanday linteg, imbaga da a nalawag a saan a nasayaat nga agtalinaed pay ditoy pagilian ti chinese envoy, ken saan a rumbeng nga ituloy nga awaten ti maysa a gangannaet a mangipak-pakita ti kaawan respeto iti soberanya ti pagilian.
