Naisayangkat ita nga aldaw, Mayo 13, 2026 iti agarup alas-8 ti bigat, iti turnover ceremony ti 100 initial reef buds para iti “Save Our Reefs” Project ti Taboc-Ili Norte Marine Protected Area idiay San Juan, La Union.
Indauloan ti Rotary Club of Makati, kadua ti Universal Leaf Philippines, Inc., Rotary Club of San Juan, ken ti Lokal a Gobierno ti San Juan, ti nasao a proyekto a panggep iti pannakasalaknib ken pannakapapigsa ti yamang-dagat ken coral reefs.
Paset iti turnover ceremony dagiti opisyal ti LGU San Juan a idadauloan ni Mayor Mariquita P. Ortega. Adda met laeng dagiti opisial ti Brgy. Ili Norte a nangipakita ti suporta iti proyekto para iti aglawlaw.
Segun kadagiti organizer, iti pannakaiwaras dagiti reef buds ket paset ti agtultuloy a panagpateg iti panangsalaknib iti kabaybayan ken panangsuporta iti biag dagiti komunidad iti baybay a nakadepende iti yamang-dagat.
Namnamaen a makatulong daytoy a proyekto iti panangmintenar ti kinabaknang ti biag iti baybay ken panangpapigsa ti pannakaammo ti publiko maipanggep iti kinapateg ti panangtaripato iti kabaybayan. (Report by Bombo Jordan)
