LA UNION – Indeklara ti Philippine Drug Enforcement Agency (PDEA) La Union Provincial Office dagiti 12 a barangay idiay Bacnotan, La Union kas drug-free.
Inruar ti PDEA ti resolusyon a mangideklara ti Drug-Free Status dagiti 12 a barangay idi Mayo 6, 2024.
Dagiti barangay ket pakaibilangan ti Agtipal, Arosip, Bacqui, Legleg, Mabanengbeng 2, Maragayap, Ortega, Pang-pang, Sapilang, Sta. Cruz, Sta. Rita ken Ubbog.
Iti pannakaideklara dagiti 12 a barangay ti Bacnotan kas Drug-Free ket maysa kadagiti napateg a kasapulan tapno maideklara ti ili a Drug-Cleared Municipality.
Dimmar-ay iti programa ti Drug-Free Status resolution da Bise Mayor Francis Fontanilla, Police Lieutenant Roger Zulueta manipud iti Bacnotan PNP ken dagiti focal person ti Municipal Anti-Drug Abuse Council (MADAC) a da Rosemarie Calpito ken ni Oscar Reyes.
Immunan a naideklara ti lokal a gobierno ti Bacnotan babaen iti liderato ni Mayor Divine Fontanilla kas Drug-Free Workplace. Gandat ti administrasion ni Mayor Divine a mairaman ti sibubukel nga ili ti Bacnotan iti listaan dagiti Drug-Cleared Municipality iti intero a pagilian.
