LA UNION – Pakabuklan a 1,240 a 4Ps ken sumagmamano a Listahanan benificiaries idiay San Juan, La Union a nakaru a naapektaran ti naglabas a bagyo Maring iti naipaayan ti tulong pinansiyal, iti sidong ti Emergency Cash Transfer program ti Department of Social Welfare and Development (DSWD).
Iti eksklusibo a pannakiuman ti Bombo Radyo La Union kenni Ms. Sheryll Bringas, Social Welfare Officer II ken Head iti Disaster Response and Rehabilitation Section ti DSWD Field Office 1, impalawagna iti ECT program ti gobyerno a naiyuswat itay nabiit idiay ili ti San Juan, La Union.
Impalawagna pay a dagiti naikkan ti nasao a cash aid ket dagiti nakukurapay nga umili ti San Juan, partikular dagiti miyembro ti 4Ps ken Listahanan a nadadaelan ti babbalay iti panagduprak ti bagyo Maring.
Impaganetgetna a ti listaan dagiti benificiaries ket nagtaud iti lokal a gobyerno ti San Juan.
Iti ECT ket maysa a probisyon iti unconditional cash support para kadagiti kuwalipikado a biktima ti kalamidad kas suporta iti napartak a panagbangon dagitoy.
Kanayunan a detalye iti damag, babaen iti interview ni Bombo Rudolph Madera kenni Social Welfare Officer II Sheryll Bringas.
Kinuna pay ni Bringas a pakabuklan a P7,650 iti naited a kantidad ti kuwarta iti tunggal benipisyaryo, tapno pagpatarimaan kadagiti nadadael ti pagtaengan da ken paggatang iti basic needs dagitoy.
Kabayatanna, kadagiti agrek-reklamo a residente ti ili a San Juan a saan a nairaman kadagiti benipisyaryo, ket adda iti mensahe ni Bringas para kadagitoy.
