BR LA UNION – Babaen iti panagbotos, 13 a senador ti pabor kumpara iti innem a kimmontra ken maysa a nag-abstain, napaay ti mosyon ni Senador-Judge Alan Peter Cayetano a mangitantan iti desisyon iti voting threshold a maaramat iti panang-sentensiya ti kaso ni Bise Presidente Sara Duterte.
Binabalaw ni Cayetano iti bileg ken timing ti impeachment court, bayat nga impaganetget ni Senator-Judge Pia Cayetano a ti Korte Suprema ken saan nga ti Senado ti addaan poder iti isyu, isu nga inwaragawag dagiti dua a saan da a makipaset iti panagbotos.
Kasta met ni Senator-Judge Imee Marcos, nangipeksa daytoy ti panagamak ken impaganetget na a rumbeng nga agtalinaed a nakabase iti Konstitusyon iti bilang ti botos iti impeachment court.
Nagbalin met nga emosyonal iti panagdenggeg iti trial ni Senator-Judge Camille Villar, a sinuportaran ti kabsatna a ni Senator-Judge Mark Villar, mainaig kadagiti pasagid kadagiti saan a makadar-ay a mammanday-linteg a sumagsango iti kaso, ken pinasarunwan met ni Senator-Judge Bong Go iti panangibaga na nga amangan nu awanen ti mabati a kadwa na, kalpasan a paboran na ti pannakaitantan iti nasao nga isyu.
Laksid dagiti serye ti emosyonal nga apela ken legal a panagprotesta manipud ti kampo dagiti kaalyado ni Bise Presidente, pormal latta nga ituloy ti mayorya ti impeachment court ti opisyal a pangeddeng iti allagaden ti binnotosan.
Nangipaay met ti suhestiyon ni Senator-Judge Vicente Sotto III ken impaganetget na nga awan ti sigurado a numero a “16” iti Konstitusyon no diket ti sapasap nga allagaden ti two-thirds a maisupadi iti pannakaawat dagiti dadduma a kakaduada.
