SAN FERNANDO CITY, La Union – Umabot iti 140 bogus a wiegthing scale wenno timbangan iti dinadael ti gobierno lokal iti suidad ti San Fernando, La Union.
Iti pannakiuman ti Bombo Radyo kenni San Fernando City Treasuerer Edmar Luna, kinunana a dagiti timbangan ket nakompiskar manipud ti naduma-duma a pagtagilakuan iti suidad.
Saan a calibrated ken saan met a rehistrado dagiti a mabalin a makapagsaor iti timbang kadagiti aggatgatang.
Sigun kenni Luna, dinadaelda dagiti timbangan tapno saanen a mausar ken agpaay met daytoy a patigmaan kadagiti negosyante a sumurot iti pagannurutan ti suidad maipapan ti panagnegosio tapno maliklikan ti penalty ken pannakataktak.
Panggep ti nasao nga addang ti gobierno lokal a masalwadan dagiti aggatgatang manipud kadagiti managgundaway a negosyante.
Kadagiti maduktalan a negosyante a mapaneknekan nga agar-aramat ti bogus a timbangan ket maipaayan ti multa nga umabot iti P1,000 agingga P5,000 base iti nakalanad ti 2018 Revenue Code and City Ordinance No. 2010-010.
