LA UNION – Umaboten iti nasurok 140 a tattao ti natay kalpasan ti panagbettak ti oil tanker idiay Nigeria.
Maibasar iti imbestigasyon dagiti otoridad, napukawan ti kontrol iti driver ti tanker isunga bimmaliktad ti lugan, asideg iti babbalay idiay Majiya, Jigawa, Nigeria.
Nasugatan met iti aganay 70 a tattao ken dagus a naiturong dagitoy iti pagagasan.
Posible a ngumato pay iti bilang dagiti natay gaputa nakaru ti kondisyon dagiti dadduma a biktima.
Siniguro met ti gobyerno a tulungan dagiti biktima bayat iti pannakaisayangkat ti imbestigasyon dagiti otoridad.
Maibilang daytoy a second major tanker disaster idiay Nigeria iti uneg laeng ti maysa a bulan. Idi Setyembre, umabot manen ti 48 ti natay idiay Niger state gaputi bimmaliktad ken bimtak nga oil tanker.
Gagangay ti fuel tanker accidents iti nasao a pagilian gaputi saan a nasayaat a kondisyon iti kalsada idinto nga umabot ti 50 million liters ti gasoline a makon-konsumo da ti inaldaw ket maitur-turong iti gas stations ken end users.
Maibasar iti datus ti Federal Road Safety Corps idiay Nigeria, nasurok a 1,500 a tanker accidents ken 535 deaths iti nailista idi laeng tawen 2020.
Naamwan a mamin-innem a daras a ngimmato ti presyo ti krudo iti nasao a pagilian, sipud inikkat ni President Bola Tinubu iti fuel subsidies idi napan a tawen.
