LA UNION – Umabot iti 150 baboy ti nakatuding a maparte kalpasan a makitaan iti sintomas ken nagpositibo iti sumagmamano kadagiti nasao a taraken ti African Swine Fever (ASF) idi ili ti Aringay, La Union.
Sigun kenni Aringay Municipal Agriculturist Ben Magno, umabot iti 70 hog raisers ti apektado iti naisayangkat a culling operation idiay Barangay Sta. Rita West ken Sto. Rosario East.
Impanamnama met ni Magno nga ipaayan ti gobyerno iti ayuda dagiti nadakamat nga agtartaraken iti baboy.
Kabayatan, tuloy iti operasyon ti slaughter house ken panangilako iti karne ti baboy idiay Aringay, ngem awan iti aggapu nga aniaman a produkto daytoy manipud kadagiti nasao a barangay.
Inlawlawag ni Magno kadagiti agtartaraken iti baboy a ti culling operation ket maysa laeng kadagiti wagas tapno saan nga agwaras ti ASF ken masalwadan iti pagsapulan dagitoy.
Malaksid iti ili ti Aringay, immuna metten a nakailista iti kaso ti ASF iti sumagmamano nga ili ti La Union kas iti Sudipen, Agoo, Sto. Tomas, ken Pugo, karaman iti syudad ti San Fernando.
