LA UNION – Umaboten iti pakabuklan a 15,348 nga indibiduwal ditoy syudad ti San Fernando iti natudukanen ti COVID-19 vaccine sipud nangrugi ti inoculation ti bakuna agingga idi July 10, 2021.
Base daytoy iti report ti City Health Office.
Manipud iti nasao a bilang a 15,348 nga indibiduwal a nabakunaan, 2,553 kadagitoy iti nakaawaten ti dua a doses wenno fully vaccinated.
Nu ibasar iti populasyon ti San Fernando, nasurok kumurang nga 88,000 a tattao iti kasapolan a mabakunaan tapno magun-od iti herd immunity ken agbalin a natalged ti kommunidad manipud iti COVID-19.
Isutgapuna nga agtultuloy iti panangallokoy ti lokal a gobyerno kadagiti residente, nangruna dagiti karaman iti A1-A4 poriority group nga agpalista ken agpabakuna, tapno maikkan ti proteksiyon iti bagi kontra iti COVID 19 ken maabot iti herd immunity a 70% manipud iti pakabuklan a populasyon.
