LA UNION – Manarimaanen iti COVID vaccine rollout kadagiti pribado nga ospital ken district hospitals ditoy probinsiya ti La Union.
Pakabuklan a 1,063 sinovac vaccines manipud iti simmangpet a second batch ti bakuna idi Lunes iti alokasyon para ditoy probinsiya.
Idi kalman, Marso 10, rinugyan ti Lorma Medical Center iti panagbakuna ti sinovac kadagiti healthcare workers babaen iti panangiyuna ni Doctor Mario Bautista, agdama a director iti nasao nga ospital.
Malaksid iti Lorma, nabunongan met ti sinovac vaccines para iti rollout iti Bethany Hospital, La Union Diagnostic Center, Agoo Family Hospital, ken dagiti 5 a district hospitals ditoy probinsiya.
Kabayatanna, iti eksklusibo a pannakiuman ti Bombo Radyo La Union kenni Provincial Information Officer Adamor Dagang, kinuna na nga addan ti pakabuklan a 1,544 healthcare workers iti nalpasen a nabakunaan kontra COVID 19.
Daytoy ket limbesen iti immuna a target a 1,500. Nupay kasta, imbaga ni Dagang a nasay-sayaat pay nu magun-od ti probinsiya iti 2,000 turnout wenno bilang dagiti medical frontliners a mabakunaan para iti first batch.
Dagitoy ket natudukan iti umuna pay laeng a dose iti COVID vaccine.
Kabayatanna, dagiti simmangpet nga AstraZeneca vaccines ket limitado laeng agsipudta maipangruna dagiti nataengan nga healthcare workers iti pakaipaayan daytoy.
Iti umuna a paset ti COVID vaccine rollout ditoy probinsiya ti La Union ket manamnama a maileppas iti unge ti dua a lawas.
