BR LA UNION – Kinumpirma ni Senator Francis “Chiz” Escudero, a nabotosan kas presiding officer ti senate impeachment court, a kasapolan ti saan a bumaba iti 16 a botos dagiti senador tapno makedngan a guilty ni Vice President Sara Duterte iti impeachment trial.
Iti mensahe na kalpasan nga inawat na ti posisyon ita nga aldaw ti Lunes, imbaga ni Escudero a nalawag iti Konstitusyon nga awan iti opisyal a makedngan iti maysa nga impeachment trial nu awan ti pananganamong ti two-thirds iti pakabuklan a miyembro ti Senado.
“With 24 members of the Senate, a literal interpretation of this means that conviction requires the affirmative vote of at least 16 senator-judges,” ani Escudero.
Inlawlawag na a ti nasao nga interpretasyon ket maiyannurot iti nagbalin a desisyon ti Korte Suprema iti kaso a Bayan vs. Zamora idi 2000, a natalantan ti kasapolan a two-thirds vote ti Senado.
Gaputi dayta, maiparbeng kuna ni Escudero a suruten daytoy tapno saan a maapektaran iti karbengan ti respondent ken dagiti umili.
Impaganetget pay ti senador a pagrebbengan ti tunggal senador nga agserbi nga ukom a suruten ti maipatpatungpal a linteg, anyaman iti personal a kapanunutan.
Immuna ti daytoy, nabotosan ni Escudero kas presiding officer ti impeachment court iti botos a 12 pabor ken walo ti kimmontra.
Addan kapadasanna a nangidaulo ti impeachment court idi 2025 bayat nga isuna ti Senate President.
Pinalagipan na pay dagiti pada na a senador nga itandudo ti panagbalin a patas ken awan pab-paboran iti panagdengngeg ti kaso maiyannurot iti Konstitusyon ken agraraira a linteg.
