LA UNION – Umaboten iti 1,687 a displaced OFWs iti nag-avail ti balik pinas balik hanapbuhay program ti OWWA iti intero a rehiyon uno.
Maysa daytoy a livelihood assistance ti OWWA Region One tapno tulongan dagiti ex-ofw a maital-o ti panagbiag da, kalpasan ti saan a naballigi a panagtrabaho dagitoy iti ballasiw taaw.
Maipapaay laeng ti nasao a programa kadagiti displaced wenno distressed ofw members a napasubli ditoy Pilipinas gaputi saan a nasayaat ken natalged a situasyon da iti pagilian a nagturongan dagitoy.
Kangrunaan a makagapo iti panagawid ditoy pagilian dagiti ofws ket gaputi isyu ti pannakamaltrato ken kinaranggas dagiti employer, panaglabsing iti kontrata, panagsakit, ken pannaka-aksidente.
Nupay kasta, dumalan latta iti nainget a proseso, validation, ken assessment dagiti ag-avail nga ofws ken rumbeng nga aktibo dagitoy a miyembro ti nasao nga opisina.
Maka-awat dagitoy ti P5,000 agingga P20,000 depende iti assessment ti OWWA ket mabalin nga usaren da ti nasao a kantidad a pangrugyan ti negosyo wenno puonan para iti pagbiagan dagitoy.
Kaadwan a benipisyaryo iti BPBH program ket idiay Pangasinan nga addaan ti 879; La Union – 382; Ilocos Sur – 174; ken Ilocos Norte – 154.
Inlawlawag ti OWWA a nainget a bantayan ken I-monitor da dagiti benipisyaryo tapno masiguro a mausar iti umno ti kantidad a naited kadagitoy nga distressed ofws.
