LA UNION – Nairut iti ipatpatungpal a Bantay Dagat Operation dagiti kameng ti Municipal Agriculture Office (MAO) ken Fishery Division kadagiti coastal areas idiay Aringay La Union.
Nabiit pay a nakakumpiskar dagiti kameng ti MAO, iti 17 a bukatot partikular iti masakopan ti Brgy. Sta Lucia ken Barangay Samara idiay Magsiping River, a maibilbilang a No Fishing Zone.
Iti bukatot ket maysa a kita ti fishing net wenno napino nga iket ngem iligal daytoy nga usaren dagiti mangngalap, agsipudta maala amin a babassit a lames a saan pay a rumbeng a masigay.
Dagus nga inakas dagiti maseknan dagiti 17 a bukatot ngem awan iti natiliw a mangngalap.
Naminsan pay a pinalagipan ken binallaagan ti MAO dagiti maseknan a residente kangrunaan na dagiti mangngalap nga isardeng iti iligal a wagas ti panagkalap, para iti pagsayaatan ti pamilya ken maprotektaran pay ti taraon nga agtataud iti kadanuman.
