LA UNION – Umabot iti 17 nga indibiduwal iti inarestar dagiti otoridad idi kalman idiay Barangay Ilocanos Sur, San Fernando City, La Union gaputi panaglabsing da iti protocol ti Enhanced Community Quarantine (ECQ) a mandato nga agsuot ti face mask tapno masalakniban ti bagi kontra COVID 19.
Iti eksklusibo nga interview ti Bombo Radyo kenni Brgy. Kapitan Edwin Yumul, kinuna na nga imbes nga agmulta ti P1-k dagiti violators ket napatawan da laengen iti disciplinary action iti mismo barangay auditorium.
Maipalagip a nakailanad iti naipaulog nga Executive Order No. 53, a masapol nga amin a residente intero a syudad ti San Fernando ket agsuot ti face mask.
Impaganetget met ni City Councilor Jessie Miranda iti kinapateg ti kanayun a panagsuot ti facemask nangruna ita a kangitingitan pay laeng iti coronavirus, a nakatayan iti adun a tattao iti intero a sangalubongan.
Reaksiyon daytoy ni Miranda iti pannakatiliw idi kalman ditoy syudad iti 17 nga indibiduwal a saan a nakasuot ti facemask bayat nga adda da iti igid ti baybay.
Segun kenni Miranda, uray pay dagiti mangngalap ket nasken nga agsuot ti face mask, agsipudta maysa daytoy kadagiti annuruten iti maipatpatungpal ita nga ECQ tapno malapdan iti panagsaknap ti COVID-19.
