Pimmusayen iti 18-anyos a ni alyas Leo, a nangpaltog iti sigud a nobia na iti uneg ti Sta. Rosa Integraded School idi kalman, Agosto 7.
Iti maysa nga statement ita nga aldaw ti Biyernes, Agosto 8, kinumpirmar ti maysa kadagiti kabagyan ni Leo a pimmusay daytoyen kalpasan a nagpasar ti nakaro a panakadangran gapo iti panangpaltog na iti bukod na nga ulo, sumagmamano a kanito kalpasan a pinaltugan na iti 15-anyos a ni alyas Lea.
Maibasar iti inisyal nga imbestigasyon, napasamak iti insidente iti mismo a silid-pagadalan ni Lea. Natamaan ti bala iti tengnged na ken dagos a naiturong iti maysa nga ospital idiay Cabanatuan City, nga iti agdama ket agtultuloy pay laeng a maob-obserbaran ken agtaltalinaed nga adda iti kritikal a kondisyon.
Nagpanawagan met iti pamilya ni Lea ti tulong pinansyal para iti operasyon ken agtultuloy a panagagas ti balasitang.
Iti nagsina a post iti social media, imbinglay dagiti kabagyan ti biktima nga agtultuloy a lumablaban daytoy iti laksid ti napasaran daytoy a panakadangran.
Agtultuloy iti imbestigasyon dagiti otoridad seknan iti insidente ken iti motibo ti krimen.
Kabayatanna, iti nagsina a waragawag, agpada a kinondena ti DepEd Central Office ken Schools Division Office (SDO) ti Nueva Ecija iti kinaranggas, bayat a napapigsa iti seguridad iti pagadalan ken makikokoordinar metten iti SDO iti pulisya para iti naing-inget nga imbestigasyon.
Nangipaay metten ti psychosocial support ken stress debriefing para kadagiti estyudante ken mannursuro nga apektado ti insidente.###
