BR LA UNION – Nadunor iti bukot ti maysa a 19-anyos a vendor kalpasan ti maipagarop a panangbagsol ti suspek a 41-anyos a construction worker agarop alas 9:10 ti rabii idi Lunes, Agosto 31, 2026 idiay Barangay Ilocanos Sur, City of San Fernando, La Union.
Iti biktima ket residente ti Barangay Dallangayan Oeste bayat a ti suspek ket agnanaed ti Barangay Catbangen ditoy siyudad ti San Fernando.
Maibasar iti inisyal nga imbestigasyon dagiti otoridad, agpada nga agin-inom ti nasanger iti uneg ti maysa a videoke house iti grupo ti biktima ken maysa pay a grupo iti nagsina a lamisaan.
Iti saan pay nga ammo a rason, timpuar ti nabara a riri iti baetan ti dua a grupo, ngem naatipa ken napagkalma ti sitwasyon.
Kabayatanna, maysa a lalaki manipud iti grupo dagiti suspek ti rimuar manipud iti nasao bar, ngem idi agsubli ket kadwanan ti suspek nga armado ti maipagarop a ‘kumpay’.
Idi makita ti grupo ti biktima iti suspek a nakaimet ti ‘kumpay’, naalarma da ken timmaray dagitoy.
Maipagarop a kimmamat dagiti suspek ket napasamak manen ti pisikal a laban iti sangwanan ti store, nga asideg ti nasao a videoke house.
Kas resulta, nabagsol iti bukot ti biktima babaen ti kumpay nga armas ti suspek.
Dagus a naiturong ti biktima idiay La Union Medical Center para iti pannakaagas na.
Agtultuloy ti imbestigasyon ti pulisya iti nasao nga insidente.
