Agtaltalek ni 1Sambayan Coalition Co-Convenor Atty. Howard Calleja a saan a ‘politically motivated’ ti panangipila ti kaso kontra kadagiti sumagmamano a senador nga agdama a miembro ti Senate majority bloc.
Maipalagip a timpuar ti warrant of arrest kontra kenni Sen. Jinggoy Estrada gapo iti sangsangwen na a plunder case manipud Sandiganbayan ken ita ket nakadetene isunan ti maysa a Bureau of Jail Management and Penology (BJMP) facility idiay Quezon City.
Agdama metlaeng a maim-imbestigaran dagiti dadduma pay a senador a kas isuda Sen. Joel Villanueva ken Sen. Chiz Escudero, nga agpada a nairaman ti nagan da kadagiti maanomalya a flood control projects.
Segun kenni Atty. Calleja, nanaganan dagiti nasao a Senador kadagiti serye ti imbestigasyon iti Kongreso ken Ombudsman a mapapati a nagbenepisyar kadagiti kickbacks manipud kadagiti korap a proyekto iti gobierno.
Dagiti kaso a nabukel ken naipila kunana ket saan a saritaan ti politika nu ketdi para iti ‘accountability,’ agsipud ta kaadwan kadagiti ebidensiya ket nagun-od manipud kadagiti serye ti panagdengngeg.
Innayon na nga us-usaren laeng dagiti akusado ti isyu iti politika tapno mailisi ti atensyon iti publiko manipud kadagiti alegasyon ti korapsyon ken kadagiti nasken nga ipamaysa a problema ti pagilian.
Mainaig met iti alegasyo nga adda iti ‘case build-up’ kontra ti majority bloc, kinuna ni Calleja a gagangay laeng nga arig na naggigiddan a naipila dagiti reklamo.
