LA UNION – Addan iti natalged a kasasaad iti driver ti truck ken kotse kalpasan a mairaman dagitoy iti aksidente a napasamak agarop alas 6:00 idi rabii iti kawatiwatan ti kalsada a masakupan ti Brgy. San Benito Norte, Aringay, La Union.
Base iti impormasyon a nakalap ti Bombo Radyo La Union manipud Aringay Police Station, nagsagaba iti minor injuries ti 51-anyos a driver ti truck a ni Francisco Cariaga, residente ti San Jose Delfin Albano, Isabela ken iti 43-anyos a driver iti kotse a ni Fernando Vinoya Jr., residente ti Brgy. Sibuan Otong, San Fernando City, La Union.
Base iti imbestigasyon dagiti otoridad, agpa-abagatan ti truck a nagkarga iti sinako nga abono ngem idi ag-overtake iti maysa a behikulo, nakadinnungpar na metten iti kasinnabat na a kotse nga agpa-amianan a direksyon.
Kas resulta iti insidente, naidungpar iti kotse iti ngalay ti kalsada iti southbound lane bayat a dimmungpar met iti poste ti kuryente iti truck.
Ngem nagasat dagiti dua a driver a saanda a napakarwan iti sinagrap dagitoy a dunor iti bagi.
