LA UNION – Sumangsango iti kaso a panagtakaw ti kalding ken panagikot ti iligal a droga iti dua a lallaki kalpasan a na-intercept dagitoy iti ipatpatungpal a quarantine checkpoint ti Bangar Police idiay Barangay Rissing, Bangar, La Union.
Dagiti suspek ket nabigbig nga isuda Joel Fontanilla, 30, residente ti Barangay Camilo Osias, Balaoan ken Mario Estrada, 36, agpada nga awanan ti asawa, residente ti Barangay Sablot, Balaoan.
Naamwan a nakalugan iti maysa a motorsiklo ken saan a nakasuot ti helmet dagiti suspek bayat nga awit da iti maysa a kalding idi sitaen dagiti otoridad.
Kinapkapan pay dagiti otoridad dagiti suspek ket nakakumpiskar da iti 3 plastic sachet a naglaun ti maipagarop a marijuana ken mapatta-patta nga agbalor amin ti P800.
Kabayatanna, iti eksklusibo nga interbyu kenni PMAJ MARLON PADAMADA-OIC BANGAR PS, inistorya na nga iti quarantine checkpoint iti Bangar Police Station, nabigbig mismo iti managan Danilo Velasco, 54, mannalon, residente ti Ma. Cristina East, Bangar, La Union iti kalding na, nga isuti imet dagiti suspek..
Malaksid kenni Velasco, nagsasaruno a nagturong iti cuerpo ti pulisiya dagiti dadduma pay nga indibiduwal a napukawan ti kalding, agraman iti dua a taga-Ilocos Sur.
Dagitoy ket isuda Susana Bona, natakawan ti 2 a kalding ken Alexander Rendon, agpada a residente ti Barangay Sevilla, Sta. Cruz Ilocos Sur.
Banag nga inaklon dagiti suspek nga isuda ti nagtakaw iti kalding dagitoy.
