LA UNION – Natay iti maysa a 17-anyos a barito bayat nga agtultuloy a maag-agasan ken maob-obserbaran iti ospital iti maysa pay a menor de edad, kalpasan a nadayamgus ida ti closed van iti kawatiwatan ti national highway ti La Union-Pangasinan road, partikular iti masakopan ti Damortis, Sto. Tomas, La Union.
Dagiti biktima ket nabigbig nga isuda Dexter Noche, 17 ti Brgy. Damortis ken Jimmy Seli, 16, ti Brgy. Cupang iti nasao met laeng nga ili.
Iti respondent driver a nangmando iti closed van ket nabigibig a ni Roberto Ferrer Jr., 40, addaan ti asawa, residente ti Malasiqui, Pangasinan.
Base iti report, maipagarop a magmagna iti shoulder lane ti kalsada dagiti dua a biktima idi nasagid da iti napaspas a van, a naggapo ditoy San Fernando City ken agawid koman idiay probinsiya ti Pangasinan idi mapasamak ti aksidente.
Dead-on-arrival ni Noche iti ospital gaputi nakaru nga impact ti aksidente bayat a ni Seli ket agtultuloy a maob-obserbaran iti ospital.
Kabayatanna, dagus a simmuko iti respondent driver a sumangsango ita ti kaso a reckless imprudence resulting to homicide.
