LA UNION – Nagtignayen iti Contact Tracing Team idiay ili ti Naguilian tapno amwen dagiti lugar a nagturongan ken dagiti tattao a nakapulapol dagiti pito nga indibiduwal a nagpositibo iti sakit a COVID-19.
Idi kalman ket nailista iti pito a kaso idiay Barangay Bariquir, Naguilian, La Union.
Dagiti nasao nga indibiduwal ket agcacabagyan ken agkaka-arruba idiay Sitio Tingnga ken Sitio Tal-talon iti nasao a barangay.
Iti eksklusibo a pannakiuman ti Bombo Radyo La Union kenni Barangay Kapitan June Soriano, kinuna na a posible a naakaran dagiti pito iti dua nga agkabsat nga immunan a nagpositibo iti COVID 19 ken agtaltalinaed dagitoy iti isolation facility ti nasao nga ili.
Dagiti nadakamat a pito a pasyente ket naka-strict home quarantine iti agdama.
Idi met laeng kalman, nangiruar ti maysa nga Executive Order iti lokal a gobyerno babaen kenni Mayor Nieri T. Flores tapno ipasidong iti strict lockdown ti intero a sitio ti Tingnga ken sumagmamano a paset ti Sitio Tal-talon idiay Barangay Bariquir, iti uneg ti 14 nga aldaw.
Gaputi dayta, nabalakadan iti amin a residente iti nasao a lugar nga agtalinaed da laeng iti babbalay dagitoy, tapno maliklikan iti panagwaras ti makapatay a virus.
Kabayatanna, nakailista ti 17 a baro a kaso ti COVID-19 iti probinsiya idi kalman, Nobyembre 25.
Kabilang ditoy dagiti pito manipud ili ti Naguilian, pito met ditoy syudad ti San Fernando, ken saggaysa idiay ili ti Aringay, Bauang, ken Luna, La Union.
Iti agdama, adda iti 126 active cases nti COVID 19 ditoy La Union.
