LA UNION – Impasidong ti lokal a gobyerno ti ili a San Gabriel, La Union iti Sitio Bucao Proper ken Sitio Ubbog idiay Barangay Bucao iti Total Community Lockdown.
Daytoy ket kalpasan a makailista ti nasao nga ili iti 27 a baro a kaso ti COVID 19 idi kalman, Marso, 28.
Iti eksklusibo a pannakiuman ti Bombo Radyo kenni Daryll Dacumos, information officer ti San Gabriel-LGU, kinuna na a nangrugi iti kaso kenni Patient SGLU-19 a naiturong iti ITRMC gaputi stroke.
Kas proseso, naipasidong iti RT-PCR test agraman ti kadwa na a nagturong iti ospital, ket rimuar nga agpada dagitoy a positibo iti COVID-19.
Dagus a naisayangkat ti contract tracing kadagiti tattao a nakapulapol ti pasyente partikular kadagiti kabbalay na agingga iti 100 meter radius manipud iti aglawlaw iti pagtaengan ti pasyente.
Rimuar iti nasao a contract tracing a 27 dagiti nag-positibo iti sakit.
Iti tarigagay ti lokal a gobyerno a ma-contain a dagus iti panagwaras ti virus, naisayangkat ti mass testing iti intero a sitio ubbog ken sitio bucao proper, ket maur-uray ita ti resulta daytoy.
Kagiddan ti pannakaipasidong iti ECQ dagiti nasao a lugar, maipatungpal dagiti mas istrikto a quarantine measures ken dagiti laeng essential workers iti mapalubosan a rumuar.
Mainaig ti daytoy ket ninamnaman iti panangipaay ti lokal a gobyerno iti ayuda wenno tulong, kangrunaan na iti taraon kadagiti apektado a residente.
