LA UNION – Inaresto iti pulisya dagiti dua a lallaki a nangibiyahe kadagiti troso idiay Barangay San Pablo, ili ti Balaoan, La Union.
Nabigbig dagiti suspek nga isuda Rexton Bumatay, 21; ken Milton Palangay, 23, agpada a helper ken residente iti Cervantes, Ilocos Sur.
Maipagarup a sinita iti tauhan ti Balaoan Police Station ti maysa a van a nakaparada iti igid ti national highway kasaruno iti pannakadiskobre kadagiti nasao a kontrabando.
Nakalibas met iti saanen a nainaganan a driver ti van kalpasan a maduktalan nga iligal iti pannakaibiyahe dagitoy gapu ta napaayda a makaiparang kadagiti dokumento.
14 a troso a mapatta-patta nga agbalor iti P27,240 karaman ti nadakamat a van ti innala dagiti otoridad kas ebidensya nga iparang iti korte.
Kabayatanna, maisagsagana metten iti kaso a panaglabsing iti Forestry Code of the Philippines kontra kadagiti naaresto agraman ti naglibas a driver ti van.
