LA UNION – Nakabaluden ti 35-anyos a lalaki kalpasan a natiliw daytoy iti naisayangkat a buy-bust operation idiay Barangay San Benito Sur, Aringay, La Union.
Nabigbig ti suspek a ni Bryan Boac, addaan asawa, pump attendant, ken residente ti San Jose Sur, Agoo, La Union.
Base iti impormasyon a nakalap iti Bombo Radyo manipud Aringay Police, nagatang manipud ti suspek iti maysa a pidaso ti transparent plastic a naglaon iti maatap a shabu ken narekobre manipud iti posession-na iti 2 heat sealed transparent plastic sachet a naglaon ti maatap a shabu; maysa a cellphone; maysa a caliber .38 revolver nga addaan ti tallo a bala; ken maysa a genuine P500 bill a naaramat kas buy bust money.
Ni Boac ket sumangsango ita iti kaso a panaglabsing iti Comprehensive Dangerous Drugs Act ken illegal possesion of firearm.
Kabayatanna, arestado met ti 24-anyos a baro kalpasan babaen ti naisayangkat a buy-bust operation idiay Barangay Leones West, Tubao, La Union.
Base iti report ti Tubao Police Station, nabigbig ti suspek a ni John Terrence Estoque, a karaman iti drug watchlist, ken residente ti nadakamat a lugar.
Nakumpiska manipud iti ikotna ti maysa a pidaso ti P500 bill a naaramat kas buy bust money ken dagiti maatap a marijuana a saan pay a naammuan ti dagsen ken balorna.
Sumangsango met iti panaglabsing ti Comprehensive Dangerous Drugs Act ni Estoque gapu kadagiti nakompiskar a droga kenkuana.
