LA UNION – Dumanonen iti 43 dagiti nadadael a babbalay iti entero a probinsia ti La Union gapu iti epekto dagiti naglabas a bagyo ken habagat.
Maibasar iti impormasion manipud iti Department of Social Welfare and Development (DSWD) Region 1, 20 kadagitoy ti totally damaged bayat a 23 ti partially damaged kadagiti ili ti Bacnotan, Bagulin, Bangar, Naguilian ken San Gabriel.
Manipud iti nasao a bilang, dinakamat ni Cherry Lyn Flores, municipal disaster risk reduction and management officer ti Bangar a dua a balay ti nadadael gapu iti storm surge iti ilida.
Segun kenkuana, dagus met laeng a nayakar iti natalged a lugar dagiti makinbagi kadagiti babbalay.
Kabayatanna, nakabayog pay laeng ti gale warning kadagiti amin a seaboards ti rehion uno gapu iti agtultuloy a panagtudtudona ken napigsa nga angin.
Segun ken ni Office of Civil Defense (OCD) information officer Mike Sabado, napigsa pay laeng ti dalluyon iti baybay bayat a mabalin a dumanon iti agingga 3.5 meters ti kangato daytoy gapu iti storm surge.
