LA UNION – Isagsaganan ti pulisya ti kaso kontra iti tsuper ti trailer truck kalpasan a dimmungpar ti manmanehuenna a lugan iti dua a balay idiay Barangay Ipet, ili ti Sudipen, La Union.
Sigun kenni Jimmy Moster Jr., napasamak ti aksidente kabayatan nga agmaymaysa daytoy a matmaturog iti uneg ti balayna itattay parbangon.
Nagsat met daytoy gapu ta garungyad laeng ti sinagrapna ken awan iti pamilyana idi a dimmungpar ti nasao a lugan.
Gapu iti insidente ket naribba met ti balay a kukua ni Edgar Moster Sr., ken nagasat met dagitoy gapu ta awan iti nadangran kadakuada.
Nagkaiwara met iti 1,000 bags a semento iti kalsada ken nagtitinnulong dagiti residente sadiay tapno akupen dagitoy.
Naammuan met ti Bombo Radyo manipud iti Sudipen Police Station, maipagarup a nabartek ti drayber ti trak a ni Dexter Dunglal ti La Trinidad, Benguet isu a napasamak ti aksidente.
Naggapu manipud idiay Pangasinan ti lugan ken agturong koma daytoy idiay Ilocos Norte idi a napukawan iti kontrol ti panagmaneho ti tsuper.
Madama na agpapaimbag idiay Tagudin District Hospital idiay Ilocos Sur ni Dunglal a naglak-am iti sugat iti naduma-duma a paset ti bagina.
