LA UNION – Dumalan iti thermal scanner dagiti amin nga empleyado ken bisita ti DPWH Second Eng’g. District a nakabase idiay Barangay Natividad, Naguilian, La Union.
Daytoy ti imbatad iti Bombo Radyo La Union ni Engr. Gil Lorenzo, District Engineer iti nasao nga opisina.
Iti pannakaipasidong iti thermal scanner dagiti opisyal ken empleyado ti DPWH agraman dagiti bisita ket maiyannurot iti direktiba ti central office dagitoy.
Daytoy ket wagas ti DPWH tapno maliklikan ti panagwaras ti maibilang a deadly virus a COVID-19.
Dagiti guwardiya ti mangimanehar iti body temperature scanner ken isuda met laeng ti agsungbat nu adda dagiti makalusot iti panagamiris.
Immunan a naipadamag, nga uray iti DPWH 1st Eng’g. District a nakabase ti Barangay Lingsat ditoy syudad ti San Fernando ket mangipatpatungpal iti kapada a proseso.
Base iti nakalap nga impormasyon ti Bombo Radyo, dagiti nangato ti temperatura na ket saan a mapalubosan a sumrek iti opisina.
