LA UNION – Dua nga elementary student ti nailista a natay kalpasan a malmes dagitoy iti waig kabayatan nga apektado ti nepnep ti probinsya iti La Union.
Naammuan ti Bombo Radyo kenni S/Ins. Christopher Nisperos, hepe ti Bagulin Police Station, natayen idi a masarakan ti grade two pupil ken 8-anyos a ni Rainier Arellano idiay waig ti Barangay Dagup idiay ili ti Bagulin idi kalman.
Adda iti kangitingitan ti napigsa a panagtudtudo ken agawid koman manipud iti eskwelaan ti biktima kaddua dagiti dadduma pay nga ubbing idi a maigalis daytoy kabayatan a magmagna kasaruno iti pannakaiyanudna.
Dead on arrival met idiay ospital ti grade three pupil ken 9-anyos a ni Analyn Dingwas ti Barangay Amontoc idiay ili ti San Gabriel.
Sigun kenni S/Ins. Felipe Ruiz, hepe ti San Gabriel Police Station, kapigpigsaan met iti buyat ti tudo idi nga inyanud iti danum manipud ti waig ni Analyn a magmagna laeng iti kalsada a naggapu idiay pagadalan ken agawid koman idiay balyda kaddua dagiti dadduma pay nga ubbing di kalman.
Gapu ta agtultuloy iti mapaspasaran a dakes a kasasaad ti panawen iti probinsya ket nagpalagip ti pulisya kadagiti nagannak a subaybayan dagiti annakda no sumrek ti eskwelaan wenno agawid iti pagtaengan kangrunaan kadagiti magmagna iti asideg ti pagayusan ti danum tapno saan a maulit ti napasamak a trahedya.
