LA UNION – Arestado iti dua nga indibiduwal kalpasan a makumpiskaran dagitoy iti maipagarop nga illegal logs kabayatan iti insayangkat a checkpoint dagiti otoridad idiay Barangay Castro, Sudipen, La Union.
Dagiti suspek ket pakaibilangan iti maysa a 36-anyos a mister ken 25-anyos a baro, residente ti ili a Sudipen ken Nueva Ecija.
Kinumpiskar dagiti otoridad iti 73 a pidaso wenno aganay 700 bd ft a kayo ti Gmelina ken mapatta-patta nga agbalor ti P19,000 a naikarga iti maysa nga elf truck.
Napaay dagiti nasao nga indibiduwal a makaiparang iti umno a dokumento para iti pannakaibiyahe dagiti nasao a kayo.
Dagus a naiturnover dagiti suspek agraman dagiti nakumpiskar nga illegal logs iti Sudipen Police Station.
Kabayatanna, dagiti illegal logs ket dagus met nga in-turnover dagiti otoridad iti biang ti PENRO La Union para iti umno a disposisyon.
