LA UNION – Mairekreklamo dagiti dua a lallaki ken ti maysa a barangay tanod gapu ti pananglugob iti kabagyanda idiay Barangay Dallangayan Oeste, syudad ti San Fernando, La Union.
Nabigbig dagiti mairekreklamo nga isuda Bernard Marquez, Belmor Marquez ken Cesario Rafanan.
Sigun iti biktima a ni Marlon Marquez, maipapan iti isyu ti panagkubkob iti daga iti kaarruba ti nangrugyan iti riribok kalpasan a nakangngeg daytoy ti saan a nasayaat a sarita kalpasan a sinita na daytoy.
Mapan laeng koma isuna makisarita idi a niluguban isuna dagiti suspek.
Kinuna met iti kabsat ni Marlon a ni Melanie Meneses, nagtitinnulongan dagiti suspek a kinabilda daytoy.
Maipagarup nga awan ti naaramidan dagiti nagresponde a barangay official kabayatan a dangdangranda ti kabsatna.
Kinuna pay ni Melanie, naimatanganna nga ilayat pay laeng koma ni Marlon ti ikotna a buneng idi a pinangpang-or daytoy dagiti suspek.
Ni Marlon ken naglak-am iti sugat ti naduma-duma a paset iti bagina ken natukkol pay ti tulang iti takyagna gapu ti nasao nga insidente.
Kabayatanna, inkalintegan met ti maysa kadagiti suspek a ni Bernard ti inaramidda a panangdarang kenni Marlon a kasinsinda.
Sigun kenni Bernard, sinalaknibanna laeng ti bukodna a bagi manipud ti gandat a panangtagbat ni Marlon kenkuana.
Immuna a nakalisi daytoy manipud ti pannagbat ti biktima ken nakapidot iti tabla nga isu ti inusarna a nangmalo kasaruno ti pannakaibbat ti nasao a buneng.
Imbatad ni Bernard a natural laeng nga immarayat ti kabsatna a tanod a ni Belmor ken ti kabagyanda a ni Cesario tapno masalakniban daytoy manipud iti panangdangran ti biktima.
Innayon pay ni Bernard, maipagarup a nabartek ni Marlon idi a rimmaot daytoy ken naammuanda pay nga adda ti immuna a nakairamananna a riribok sakbay nasao ng insidente.
Impaganetget pay ni Bernard nga inikkanda laeng iti pagnakman ni Marlon ken nakasaganada mangsango no adda ti maidatag a kaso idiay korte.
