LA UNION – Na-rescue iti dua a mangngalap a nagpeligro ti biag da iti kabaybayan, kalpasan a nadadaelan da ti bangka, ken naisar-ong da idiay Barangay Taboc, San Juan, La Union.
Dagiti naisalbar a mangngalap ket isuda Manuel Basera Jr. 35, ken Junel dela Cruz, 19-anyos agpada a taga Alaminos Pangasinan.
Iti eksklusibo a pannakiuman ti Bombo Radyo La Union kenni MDRRMO Officer Gino Mabalot ti ili a San Juan, kinuna na a base iti salaysay dagiti dua, idi June 12 (Independence Day) a nagpataaw dagitoy, ngem bigat pay laeng iti nasao nga aldaw ket nadadaelanen ti makina iti bangka dagitoy.
Ngem idi kalman, sumagmamano a residente iti nakakita ti nasao a bangka a nagluganan dagiti dua, a saan nga agan-andar ken maiyan-anod lattan iti taaw.
Iti patta-patta ni Mabalot, 600-700 meters iti distansiya ti bangka manipud iti igid ti baybay.
Kabayatanna, impeksa ni Mabalot babaen iti Bombo Radyo iti panagyaman na kadagiti lokal a residente, mangngalap a nagpabulod ti kagamitan na a nausar iti panangisalbar kadagiti biktima, dagiti barangay officials ken tanod, nga indaulwan dagiti kameng ti Municipal Disaster Risk Reduction and Management Office (MDRRMO), a nagtitinulong tapno ma-rescue dagiti mangngalap.
Ita nga aldaw ket nakatuding a sukunen iti makunkuna a boss dagiti dua nga aggapo idiay Pangasinan, tapno maka-awid ken makasubli metten dagitoy iti pamilya da.
Immunan nga imballaag ti PAGASA a mangrugin ita a lawas nga agraira iti habagat wenno nepnep, a pakaapektaran iti kasasaad ti panawen, agraman iti kabaybayan.
