LA UNION – Tiniliw dagiti kameng ti Philippine National Police-Highway Patrol Group iti dua a miyembro ti Metropolitan Manila Development Authority nga ages-escort iti nangato nga opisyal ti gobyerno.
Daytoy ket kalpasan a nadiskubre ti Philippine National Police-Highway Patrol Group, a saan nga otorisado nga agusar dagiti nasao nga MMDA personnel ti “Police ” ken “Master Rider’s badge” marking iti motorsiklo dagitoy, idinto nga escort da iti maysa a nangato nga opisyal ti gobyerno.
Natiliw dagiti dua nga MMDA personnel kabayatan ti insayangkat nga “Oplan Wastong Hagad” operation idiay partena ti Diokno Boulevard, Parañaque City dagiti kameng ti HPG-NCR tapno tiliwen dagiti motorista nga agus-usar ti blinker, maiyannurot iti bilin ni President Ferdinand Marcos Jr.
Segun kenni HPG-NCR Director PCol. Neil Francia, mabalin nga agserbi nga escort dagitoy dagiti pulitiko ngem iti panagusar kunana ti police markings ket nainget a maipawil, nangruna nu saan met dagitoy a lehitimo a pulis.
Iti agdama, addan iti kustodiya ti PNP-HPG idiay Kampo Crame dagiti dua nga MMDA personnel ken agpada a sumangsango iti kaso a panalabsing iti Usurpation of Authority ken illegal use of uniform wenno insignia.
