LA UNION – Dead on arrival iti ospital ti dua ng construction workers bayat a 1o ti nasugatan kalpasan a maaddagan kadagiti cemento iti kawatiwan ti Barangay Road ti Barangay Oaqui #1, Luna, La Union.
Nabigbig dagiti pimmusay a da Jerry Olpindo, 21, ken Jeremy Madrigal, agpada nga residente ti Barangay Nagsabaran iti ili ti Bangar ditoy probinsya.
Iti pannakiuman ti Bombo Radyo kenni Police C/Insp. Arsenio Rasom, hepe ti Luna Police Station, agturong ti laud nga direksyon ti dump truck a minamameho ni Eugenio Riotoc, 50, addaan asawa ken residente ti Barangay Napaset iti ili ti Luna kadua ti helper na a ni Jam Lorben, 20, ti Barangay Butubut Oeste iti ili ti Balaoan idi kellaat a nargaay iti pungto ti kalsada nga rason ti pannakatumba ti lugan iti kauneg a 7 nga kadapan.
Dagus met a naiturong iti Balaoan District Hospital dagiti nasugatan a da Alan Pascua, 29, Jerry Ormita, 24, Antonio Rivera, 35, agpapada nga residente ti Barangay Mindoro, Jesus Rivera, 36, Eric Hidalgo, 18, Reynaldo Munio, 55, ti Barangay Alzate, Chrsitopher Lopez, 26, ti Barangay Consegra, William Bustamante, 18, Joel Monis, 25, Raul Madrid, 23, ti Barangay Quintarong, ken Me-oan James Casem, 19, ti Barangay Nagsabaran iti ili ti Balaoan.
Iti sabali a bangir, gapu pay laeng iti nalukneng a daga ti makitkita nga rason ti dump truck driver a ni Riotoc no apay a nargaay ti paset ti kalsada.
Kinuna na a saan na a ninamnama a madisgrasya dagitoy nga agbanag iti pannakatay ti dua kadakuada.
Mamati pay daytoy a limmukneng ti daga gapu pay laeng ti dua nga aldaw a panagtudtudo na.
Iti agdama ket padpadaanan iti panagsarita dagiti maseknan ken ti pamilya dagiti pimmusay iti kuerpo ti pulisya ita nga aldaw.
