LA UNION – Umaboten iti 120,000 iti bilang dagiti nakapagparehistron para iti Step 1 wenno panagala ti demographic information kadagiti umili, iti agtultuloy a National ID registration ditoy probinsiya ti La Union.
Daytoy ti kinumpirma iti Bombo Radyo ti PSA Region 1 base iti kauddian a datos ti ahensiya.
Iti pannakiuman ti Bombo Radyo La Union kenni Camille Beltran, Registration Officer 4 ken Focal Person iti National ID registration ditoy rehiyon uno, kinunana a limbesen iti target da nga 86,000 nga agrehistro, agsipudta dimmanon itan iti nasurok 100k.
Iti met step 2 ditoy probinsiya wenno panagala iti biometrics para pay laeng iti National ID ket 130,000 dagiti nairehistro wenno kaibatugan daytoy ti 21% iti intero a probinsiya.
Target iti PSA Region 1 a mairehistro ti 614,000 nga indibidwal ditoy laeng La Union agingga bulan ti Disyembre iti agdama a tawen.
