LA UNION – Arestado iti maysa a 22-anyos a baro babaen iti insayangkat nga Intelligence-Driven Operation ti sumagmamano nga PNP operational support units, gaputi panagikot na iti maatap a carnap a motorsiklo.
Naarestar ti suspek a managan Jerry Calisangan, a segun kenkuana ket residente ti Fairview, Quezon City idiay Pob. Norte, Mayantoc, Tarlac.
Iti nakalap nga impormasyon ti Bombo Radyo La Union kenni PMAJ Reginaldo Dalipias, chief-of-police ti Bacnotan PS, nai-report kadakuada idi Marso 17, 2021 iti mapukpukaw a motorsiklo babaen iti akinkukua a ni Walijean Mendoza, 29, residente ti Brgy. Sevilla, San Fernando City, La Union.
Ngem gaputi intel operation dagiti otoridad, nadiskubre da iti mapukpukaw a motorsiklo idiay Mayantoc, Tarlac nga ikot ti suspek.
Pinaglibakan ti suspek a tinakaw na iti motorsiklo, ket imbaga na a nailako daytoy kenkuana.
Segun pay kenni Dalipias, napukaw iti nasao a behikulo kalpasan nga imbati ni Mendoza iti sango ti Bacnotan plaza agraman ti tulbek daytoy, tapno ag-jogging da iti kaayan-ayat na.
Babaen iti tulong ti Tarlac PNP, naiturn-over ti suspek iti Bacnotan PS para iti umno a disposisyon.
Sumangsango ita ti suspek iti kaso a panaglabsing iti RA 10833 wenno New Anti-Carnapping Act of 2016.
