LA UNION – Naarestar ti maysa nga estudiante iti Brgy. Catbangen ditoy Siudad ti San Fernando, pasado alas sais idi rabii.
Daytoy ket kalpasan a balligi a naisayangkat ti buy-bust operation babaen iti nagtitipon a pwersa ti City of San Fernando Police Station, LUPIU, PDEU, RDEU, TSC-RMFB1, CIDG-1, RACU 1, PDEG SOU 1, PDEA RSET, LUMARPSTA, RID ken 1st PMFC LUPPO.
Malaksid kadakuada ket naimatangan dagiti sumagmamano a Barangay Officials ken ti Representative ti Department of Justice ti pannakaisayangkat ti buy-bust operation.
Nabigbig ti suspek a ni Luiz Lapuz y Efondo Jr. AKA Louis, agtawen ti 22, awanan asawa ken residente ti nasao a Barangay.
Basar kadagiti otoridad, naglako ti suspek ti maysa a plastic sachet a naglaon ti maipagarup a napagango a marijuana iti maysa a pulis a nagpammarang a poseur-buyer iti balor a limagasut a pisos.
Malaksid iti daytoy, nakumpiskar pay manipod iti suspek ti tallo a plastic sachet a naglaon ti maatap a napagango a marijuana nga agdagsen ti sangapulo a gramo ken agbalor ti 1,200 a pisos, maysa a pedaso ti tube pipe, maysa a pouch wallet nga agmaris ti brown, dua a pedaso ti android phone iphone 7 nga agmaris ti nangisit ken blue pakairamanan ti nagluganan ti suspek a Honda Click nga agmaris ti nangisit.
Mainaig iti daytoy, nagkedked a mangted iti aniaman a reaksion wenno komento ti suspek iti naisayangkat a buy-bust operation kontra kenkuana.
Kabayatanna, segun ken ni Barangay Kagawad Genevev Abasolo ti nasao a Barangay, awan met dagiti nakairamramanan ti suspek iti uneg ti Barangay-da.
Naammoan a maibilang ti suspek kas Street Value Individual ken nasurok-kumurang maysa a bulan a minonitor dagiti otoridad.
Iti agdama, adda iti kustodyar ti kuerpo ti pulisia ti suspek para iti proper disposition ken pannakaipila ti kaso gapu iti panagsalungasingna iti Republic Act No. 9165 wenno Comprehensive Dangerous Drugs Act of 2002.
