LA UNION – Natay iti 24-anyos a baro kalpasan a nalmes iti kabaybayan idiay parte na ti Brgy. San Nicolas West, Agoo, La Union, idi malem ti Biyernes.
Nabigbig iti biktima a ni Kelvin Francisco ken residente ti Brgy. San Agustin Norte iti nasao nga ili.
Iti interview ti Bombo Radyo La Union kenni PCpl. Leo Gonzales, imbestigador ti Agoo Police Station, agarop ala 1:35 ti malem ket nagturong iti biktima kadwa na dagiti tallo a babbai a gagayyem na iti igid ti baybay, ngem iti laeng biktima ken maysa a gayyem daytoy iti napan nagdigos iti baybay.
Kalpasan ti sumagmamano nga oras, kellaat metten a nagpukaw ni Francisco.
Dagus a nagpatulong dagiti gagayyem ti biktima iti Philippine Coast Guard ken Agoo MDRRMO ngem timpaw laeng iti bagi daytoy agarop alas 4:27 ti malem.
Base iti report, posible nga ingguyod iti napigsa a dalluyuon iti biktima ken naamwan a saan na nga ammo ti aglangoy.
Naiturong iti biktima iti ospital ngem naideklara a dead on arrival.
